LAOAG CITY – Natay ti maysa a babai kalpasan a natennag iti derraas ti nagluganan da a kurung-kurung iti paset ti Barangay Dipilat iti ili ti Vintar.
Nabigbig ti biktima a ni Rowena Macadangdang Peñaredondo, agtawen ti 44, residente iti Barangay 34, Isic-isic iti met laeng ti nasao nga ili.
Naamoan a ti nangiturong iti kurung-kurong ket ti balasang ti biktima a nabigbig iti nagan na a Rosell, agtawen ti 20.
Iti imbestigasyon dagiti kameng ti pulisya, kabayatan ti kaadda dagiti agina iti paset ti Barangay Dipilat ket nagulaw ti driver rason a naipaigid na ti kurung-kurong ngem nagderderetso metten iti derraas nga addaan ti kauneg a 30 a metro.
Segun iti report, nakatapwak ti driver idinto a ti ina na ket naisurot iti kurung-kurong a natennag iti derraas.
Naitaray ti biktima iti Governor Roque Ablan Senior Memorial Hospital ditoy ciudad ti Laoag ngem naideklarar a dead on arrival.
