LAOAG CITY – Natay ti maysa a babai kalpasan a pinaltugan ti live-in partner na iti Barangay Labut iti ili ti Badoc.
Segun ken ni Police Lt. Jonathan Alonzo, ti chief of police iti ili ti Badoc, ti biktima ket agtawen ti 49, tubo iti San Fernando, La Union, negosyante, idinto a ti suspek a live-in partner na ket agtawen ti 44, mannalon, ken residente dagitoy iti nadakamat a barangay.
Inbatad ni Alonzo a basar iti imbestigasyon da, iti oras ti 1:50 itay parbangon ket agsinsinnungbat dagiti aglive-in partner iti balay da, agingga a napanda iti abandonado a balay a kukua metlaeng ti suspek, ket ditoyen a napasamak ti pammaltog usar ti saan pay a masinunuo ti kalibre na a paltog a nakatamaan ti akin-kannigid pispis ti biktima.
Mapatta-patta nga 40 agingga iti 50 a metro ti kaadayo ti abandonado a balay manipod metlaeng iti pagnanaedan dagiti aglive-in partner.
Kuna ni Tolentino a basar met iti palawag ti anak ti suspek a menor de edad, kalpasan a nakangngeg ti putok ti paltog ket nagsubli ti ama na iti balay da ken innala na dagiti urnong da a kwarta kalpasan na ket nagtalapwagaw iti saan a masinunuo a direksyon.
Inpakaammo ni Tolentino a naitawag laeng iti opisina da ti napasamak iti oras ti alas-3:30 ti parbangon, no sadinno nga iti panagresponde da ket nakita da ti nakadasay a biktima a madigdigusen ti bukodna a dara ken awanen ti biagna, ken adda pay ti nakita a maysa nga hand grenade iti nakapasamakan ti krimen.
Kuna pay ni Tolentino nga innem agingga iti pito a bolan paylaeng nga agdendenna ti suspek ken biktima, ngem naamoan da a sakbay iti pammaltog ket addan ti panagsinsinnungbat dagiti aglive-in partner kadagiti naglabas nga aldaw.
Inbatad ni Tolentino nga agtultuloy paylaeng ti imbestigasyon da tapno maamoan no ania ti motibo iti napasamak a pammaltog, kagiddan ti agtultuloy a panangan-anop da iti suspek.
Innayon na a possible a pilaan da ti kaso a murder ti nasao a suspek.
