LAOAG CITY – Nagtalinaed iti kustodyar ti Philippine National Police (PNP) iti ili ti Bangui ti maysa a babai a naarestar gapu iti Qualified Theft wenno panagtatakaw.
Segun kenni Police Captain Julius Basallo, Chief of Police ti PNP Bangui, nabigbig ti suspek a ni Nicole Anne Marie Alora, agtawen ti 27 ken residente ti Brgy. Abaca iti nadakamat nga ili.
Inbatad na a naarestar ti nasao a suspek iti mismo a pagtaengan da babaen ti bileg ti naiparuk-at a warrant of arrest a napetsaan idi Mayo 22 iti agdama a tawen nga inparuk-at ni Honorable Judge Felix Salvador, Acting Presiding Judge, RTC Branch 19 Bangui, Ilocos Norte gapu iti nasao a kaso.
Kunana a daytoy ket kalpasan a nagtakaw ti suspek ti kuarta iti pasdek negosyo nga umabot ti tallopulo ket maysa ribu a pisos.
Inpakaammo ni Basallo a nairekomendar ti uppat a pulo a ribu a pisos a piyansa ti suspek para iti temporaryo a pannaka-wayawaya na.
Innayon ti hepe nga awan met ti immun-una a naimaldit a rekord ti nasao a suspek.
