LAOAG CITY – Natiliw dagiti otoridad ti maysa a babai a subject ti drug buy bust operation iti Brgy. 6 iti ili a Piddig.
Nabigbig daytoy a ni Mary Jane De Leon, 50, maysa a tricycle driver ken residente ti Brgy. 3 iti nasao met laeng nga ili.
Nagatang kenni De Leon ti maysa a plastic sachet a naglaon ti maipagarop a napagango a marijuana nga agbalor ti 500 a pisos.
Malaksid iti daytoy, nakumpiskar pay ti maysa a plastic sachet a naglaon ti marijuana, sigarilyo, driver’s license ken P300 a personal a kwarta na.
Kabayatanna, naglikudan ni De Leon ti alegasyon kenkuana ken inpetteng na nga inpabulsa da laeng ti marijuana.
Segun kenkuana, napan laeng nagitulnog kadagiti kaanakan na iti eskwela idi sinada dagiti otoridad kalpasan na ket pinosasan ken pinagpagkleb da daytoy.
Kunana nga awan pay pulos ti nakairamramanan na iti iligal nga aktibidad.
Kabayatanna, kinumpirmaran ni Pol. Chief Master Sergeant Harold Nicolas iti Provincial Drug Enforcement Unit iti INPPO a maysa a newly identified drug personality ni De Leon.
Immuna iti daytoy, inbatad ni Nicolas a kalpasan a naitulod ni de Leon dagiti kaanakan na iti eskwela ket ditoyen a linakoan na ti nagpammarang a poseur buyer.
Naamoan a nabayagen a monmonitoren ti PNP Piddig ti suspek ken kaaduan kadagiti laklakoan na ti marijuana ket estudyante iti nasao met laeng nga ili.
