LAOAG CITY – Maluksaw ken nasakit ti nakem ni Ms. Tessie Morales, aglaklako iti merkado publiko iti ili ti Badoc kalpasan a natakaw ti bag na a naglaon ti agarop a 20 ribo a pisos.
Segun kenkuana, kabayatan a makumikum iti panaglako na ket saanna a napuutan nga adda ti nangala iti bagna nga adda laeng iti mismo nga abayna.
Inlawlawag na a naripar na laengen nga awanen ti bag na idi suplian na koma ti maysa kadagiti customer na.
Inbatad na a nagpatulong a dagus kadagiti pada na nga aglaklako tapno biruken da ti bag na ngem saan dan a nakita pay rason a napan na inreport iti Philippine National Police iti ili ti Badoc.
Inpakaammo na nga adda ti Closed-Circuit Television wenno CCTV a nakamontar iti uneg a mismo ti tiendaan ngem gapu ta napasamak daytoy idi sabado, Mayo 16 ket awan dagiti mabalin a mangrebisar a dagus isut gapuna nga idi laengen lunes a naaramid daytoy.
Kuna na nga iti panangrebisar da ti Closed-Circuit Television ket ditoy a nakita a dagiti linakoan na a maysa a grupo a bukbuklen ti dua a babai ken uppat a lallaki ti nangala ti bagna.
Innayon na a kalpasan a naipadamag nga adda ti grupo a natiliw iti Sto. Domingo, Ilocos Sur ket nagturong da kadwa na dagiti kameng ti Philippine National Police iti ili ti Badoc tapno lasinen no dagitoy dagiti suspek iti panagtakaw iti tiendaan ti nasao nga ili.
Positibo met a binigbig na dagiti suspek gapu iti Closed-Circuit Television footage ngem uppat laeng dagiti natiliw gapu ta maipagarop a dagiti dua ket nagdissaag da iti Magsingal, Ilocos Sur.
Iti baet a natiliw dagiti uppat manipod iti innem a suspek ket saanen a napasubli pay ni Morales ti bagna a naglaunan ti pakabuklan a P19, 700.00 gapu ta mabalin a dagiti dua a nagdissaag iti Magsingal, Ilocos Sur ti ayanna.
