LAOAG CITY – Maysa a babai a manipud iti New Zealand ti nangipila ti kaso kontra iti nobiona gapu iti saanna a panangitulod kenkuana iti eropuerto rason a nakaladawan ken nagbayad ti extra tapno i-reschedule ti biahena.
Basar kadagiti legal a dokumento nga inruar ti Disputes Tribunal of New Zealand, dagiti claim ti babai nga aggatad iti $30,000.
Segun iti babai, kiniddawna iti nobiona nga itulod iti airport iti umno nga oras gapu ta adda konsierto nga attendaran a kadua dagiti pagayamna no sadinno a nagkari ti nobio.
Immanamong ti nobio nga agtalinaed iti apartment ti nobiana ken pakanen dagiti aso kabayatan nga adda iti ballasiw-taaw ti babai.
Nupay kasta saan a tinungpal daytoy ti nobiona ken nagastosna ti ado a kuarta ti nobiana.
Kabayatanna, agkidkiddaw ti babai a bayadan ti nobiona ti amin a gastosna.
