LAOAG CITY – Agtultuloy ti imbestigasyon ti Bureau of Fire Protection (BFP) iti ili ti San Nicolas iti pannakauram ti maysa a backhoe iti Barangay San Marcos iti nasao nga ili.
Segun kenni Senior Fire Officer I Donald Isagire, ti Chief Admin ti Investigation and Inspection Office iti BFP iti nasao nga ili, karaman kadagiti kitkitaen da a posible a rason ket ti short circuit.
Inlawlawag na nga immabot iti 15 a minutos ti byahe da sakbay da a nakadanon iti lokasyon gapo ta manarimaan ti pannakatarimaan ti kalsada nga agturong iti ayan ti backhoe.
Ummuna iti daytoy, adda ti naawat a tawag ti BFP San Nicolas nga adda ti maur-uram a backhoe a nakaparking iti igid ti kalsada ken idi dimmanon da iti lugar ket dakkelen ti apoy.
Iti inisyal met a panagimbestigar da, 4:30 idi nalpasen ti panagtrabaho ti operator ken nakaawiden daytoy idi napasamak ti uram.
Mainaig iti daytoy, adda met ti panagsasarita da iti operator ken driver ti nasao a backhoe.
