LAOAG CITY – Natiliw ti maysa a lalaki a katurturposna laeng iti kina-dentista iti naiwayat a drug buy bust operation ditoy ciudad ti Laoag.
Nabigbig ti subject a ni Michael Garces Jr., agtawen ti 36, ken residente iti Brgy. Albano iti ili ti Dingras.
Narekobre dagiti otoridad iti dua a sachet a naglaon ti maipagarop a shabu, sumagmamano a drug peraphernalia ken ti sangaribo a pisos a nausar ti operasyon.
Inbatadna a naarami na iti nagusar ti illegal a droga gapu iti panagsagsaganana iti board examination iti kina-dentista.
Segun ti PNP, masansan a makitkitada ni Garces ditoy ciudad ti Laoag isut gapuna a nagatapda nga agu-usar ken aglaklako iti illegal a droga.
Nupay kasta, kunana ni Garces a masansan nga adda ditoy ciudad ti Laoag gaputa mapmapan iti laboratoryo a pagar-aramide da iti ngipen ken manarimaan iti panagreviewna para iti board examination.
Iti agdama, nagtalinaed iti kustudyar ti PNP ditoy ciudad ti Laoag ni Garces ken maisagsaganan ti maipila a kaso kontra kenkuana.
