LAOAG CITY – Dead on the spot ti maysa a balasang kalpasan ti napasamak a desgrasya iti Sitio Ampuroken, Barangay Sulbec iti ili ti Pagudpud.
Nabigbig daytoy a ni Liezel Jane Caletena, agtawen ti 21, balasang ken residente iti Barangay Poblacion 2 iti nasao nga ili.
Segun kenni Police Captain Eduardo Santos, ti chief of police tik PNP-Pagudpud, ti biktima ken dagiti kapamilya partikular ti ama, ina ken ti maysa pay a kabsat na ket naggapo da iti Barangay Caunayan.
Inbatad na nga agawid kuman dagitoy ken bayat nga agpapa-abagatan da a direksyon a nakalugan ti kurong-kurong ken nadungpar da ti dakkel a bato rason a nagbaliktad ti nagluganan da.
Kunana a ti ama nga isu ti driver ket adda iti impluwensya ti nasanger ken ti kurong-kurong ket awan ti silaw na isut gapo na a nagpapainayad da iti igid ti kalsada ngem kellaat a naidungpar iti dakkel a bato.
Kas resulta, kuna ni Santos nga iti panagbaliktad ti kurong-kurong ket napandagan ti ulo ti balasang.
Naitaray met ti ina ken ti anak na pay a maysa iti Bangui District Hospital idinto a ti ama ket naipan iti Maraino Marcos Memorial Hospital and Medical Center iti ciudad ti Batac.
