LAOAG CITY – Nagkamang ni Mrs. Jesusa Arconado, residente iti Barangay Gabu Sur ditoy ciudad ti Laoag ditoy Bombo Radyo kalpasan a saan da a mabirukan ti anak na a babai a menor de edad a ni Eirllhy Chelle Joy Arconado.
Segun kenni Mrs. Arconado, idi Biyernes ket nagpakada ti anak na a sumurot iti lola na a mapan iti ili ti Vintar isut gapo na a pinalubusan da daytoy.
Nupay kasta, kunana nga idi kalman ket adda ti nagchat kadakuada a ti anak na ket naglugan iti maysa a bus ken nagturong idiay Metro Manila.
Gapo iti daytoy, inbatad na a ti kasinsin na ket timmawag kadagiti numero a naited kadakuada a pakakontakan da iti anak na ngem ti nakasarita da ket lalaki a maipagarop a taga Parang, Marikina City ken agnagan ti Jasyon del Castillo.
Kunana a ti sungbat ti lalaki ket agkadwa da iti anak na a balasitang ken saan na a kayat ti makisarita kadagiti nagannak kenkuana, ken kalpasan daytoy ket saan dan a matawagan ti nasao a numero.
Ummuna iti daytoy, inbatad ni Mrs. Arconado nga awan pay ti makatawen nga agam-ammo ti anak na ken ti lalaki gapo ta nangrugi laeng ti komunikasyon da idi adda ti pandemya.
Napalaos met ti panagamak na no agpayso nga adda idiay Manila ti anak na gapo ta maymaysa na daytoy a nagturong iti nasao a lugar.
Inlawlawag na a saan da pay a naam-ammoan iti asawa na a nagipagpagna ti papeles ti anak na kas iti barangay clearance ken barangay certificate gapo ta mapmapan da agtrabtrabaho.
Atapen na a ti naur-urnong a kwarta ti anak na ket isu ti inausar na a panangiproseso dagiti masapol a dokumento.
Mainaig iti daytoy, kuna ti ina nga Arconado a mabalin a ti rason ti panagtalaw ti anak na ket ti pannaka-unget na ngem saan na a ninamnama gapo ta kalikagom na laeng nga agbalin a responsable ti anak na nangruna ket daytoy ti inauna.
Kabayatanna, ti naudi a bado ti anak na ket stripes ken nakapantalon ti blue ken saan unay a natayag.
