LAOAG CITY – Nagbalin nga emosyonal ti maysa nga ina iti pannakainterview na ditoy Bombo Radyo Laoag kalpasan a nagtalaw ti anak na a balasitang ditoy ciudad ti Laoag.
Segun ken ni Mrs. Liezel Ngayan iti Barangay Buttong ditoy ciudad ti Laoag, pimmanaw ti anak na a ni Danica Gayle Alejo, agtawen ti 16 iti rabii idi miyerkules, Marso 31 ita a tawen.
Inistorya ni Ngayan a sakbay a timmalaw ti anak na ket adda ti panagsinnungbat da gapu ta cellphone lattan ti ub-ubraen na no sadinno nga iti aldaw ti miyerkules ket saan pay a nangaldaw.
Innayon na nga iti rabii ti miyerkules ket ayaban na ti anak na a mapan mangan ngem saanna pulos ikaskaso gapu ta makumikum iti cellphone ti balasitang.
Gapu iti daytoy, kuna ti nasao nga ina a nagsinnungbat da iti anak na ket saanna inpagarop a pumanaw ti balasitang iti balay da.
Inpakaammo pay ni Ngayan a naibaga kadakuada dagiti dadduma nga annak na nga adda ti kakitkita ti balasitang a lalaki ken ik-ikkan na ti meryenda.
Innayon na a nakigtot laengen idi nakariing ti kadwa da a balasang ket inpakaammo na nga awan ti anak na a ni Danica.
Inbaga ni Mrs. Ngayan a nasursur da aminen dagiti papagayam ken makaam-ammo iti anak na ngem uray dagitoy ket saanda nga ammo ti ayan ti balasitang.
Saan da met nga ammo no taga ano ken ania ti kinatao ti lalaki a kakitkita ken mapan mangmangted ti meryenda ti balasang na.
Nagpakpakaasi ti ina iti anak na nga agawiden gapu ta saanen a makaturturog ken makapangpangan a mangpanpanunot kenkuana.
Agpapan maisursurat daytoy a damag ket saan pay a nakita wenno nagawid iti balay da ti nasao a balasitang.
