LAOAG CITY – Kinumpirmaran ni PMaj. Julius Basalio, ti hepe ti PNP-Bangui a maysa a balasitang nga agtawen ti 13 ti biktima ti panagrames iti nasao nga ili.
Inbatad ni Basalio a basar iti naiyuswat nga imbestigasyon, agtawen pay laeng ti 11 ti balasing idi immuna a nagundawayan babaen ti karruba da nga agtawen ti 57.
Kuna na nga iti mismo pagtaengan ti balasitang ti panggungundawayan ti suspek.
Inpakaammo ni Basalio a gundawayan ti suspek ti biktima nu makita na a pumanaw ti ama na a mapan agkalap iti rabii.
Kuna na a basar iti palawag ti biktima, saan a dagus a nagipulong gapu iti panagbuteng.
Nu pay kasta, inbatad na a gapu iti panagpasar ti biktima ti trauma ken pannakapukaw ti pokus na ket naiyumanna ti panangungudaway ti suspek kenkuana iti uneg ti dua a tawen.
Naamoan a maymaysa ti balasitang iti pagtaenganda nu pumanaw ti ama na gapu ta nagsina da iti ina na ken ti step-mother na ket agnanaed iti sabali a pagtaengan.
Iti agdama, nagtalinaed iti kustodyar ti PNP-Bangui ti suspek bayat a maisagsagana ti kaso a rape a maipila kontra kenkuana.
