LAOAG CITY – Umabot iti 300 a ribo a pisos ti balor dagiti nadadael iti pannakauram ti maysa a balay iti Sitio Cabatacan iti Barangay 23, San Matias ditoy ciudad ti Laoag.
Basar iti Bureau of Fire Protection, naminpinsan a dimmapo ti sibubukel a balay gapu ta naaramid daytoy iti light materials.
Naamoan nga awan dagiti akin-balay idi napasamak ti uram gapu ta napan da amin nagatendar iti maysa a pasken iti Barangay Bacsil South ditoy ciudad.
Agpapan maisursurat daytoy a damag ket awan pay ti naestablisar dagiti kameng ti Bureau of Fire Protection a nangrugyan ti apoy.
Gapu iti napasamak ket napan paylaeng nakipagnaed ti pamilya a napukawan ti balay iti kabagyan da.
