LAOAG CITY – Nauram ti 2 storey residential house iti Barangay 5, iti ili ti Vintar.
Naamuan a sakbay ti insidente, nakita dagiti karruba ti agtagikua ti balay nga agwalwala daytoy ken inpagarup da a gagangay laeng sipud ta rumrumuar nga adda problema na iti utek.
Ngem nakigtot da gapu ta kellaat nga adda bimtak iti maikadwa a kadsaaran nga isu ti maipagarup a namunganayan ti uram.
Manipud iti maikadwa a kadsaaran, nakita da ti agtagikua iti balay a naglagto iti ruar.
Mainaig iti daytoy, nagresponde ti Bureau of Fire Protection, maysa a fire truck ti nausar manipud iti nasao nga ili ken maysa a met iti ili ti Bacarra.
Kabayatanna, basar iti obserbasyon ti Bombo Radyo Laoag News Team, naaramid iti light materials ti maikadwa a kadsaaran isu nga alisto a nagkayamkam ti uram ken naamuan pay a maymaysa ti agtagikua nga agnanaed iti nasao a pagtaengan.
Iti agdama, mannarimaan pay laeng ti iwaywayat dagiti kameng ti Bureau of Fire Protection nga imbestigasyon idinto a ti akinkukua ti pagtaengan ket manamnama a maipadalan iti psychological examination.
