LAOAG CITY – Nadadael ti sumagmamano a paset ti maysa a balay kalpasan a dinalapos ti napigsa nga alipugpog iti Barangay Apaya ditoy ciudad ti Laoag.
Basar iti akinkukua ti balay a ni Mrs. Margarita Evangelista Asuncion, kabayatan ti panagidalimanek da kadagiti alikamen da gapu ta agamak da a maapektaran dagitoy iti layos ket bigla a nakangngeg da ti naidumduma a ringgor.
Inbatad na nga iti iruruwar da ket nakita da ti pannakaikkat ti sumagmamano a galba ti pagtaengan da rason a nabasbasa dagiti gamitda ken inbag-ot na pay ti maysa a kwarto da.
Gapu iti daytoy, inpakammo ni Asuncion a nagdesisyon da nga agbakwit paylaeng tapno masigurado ti kinatalged da a sangapamilya.
Kuna na a napan da paylaeng iti sabali a balay ngem nagsubli da metlaeng iti pagtaengan da apaman a nagsardeng ti tudo.
Innayon na nga inreport da a dagus daytoy iti kapitan ti barangay, nga isu met ti nangipakaammo iti City Social Welfare and Development ditoy ciudad ti Laoag.
Inrakurak pay ni Asuncion nga adda metten dagiti kameng ti City Social Welfare and Development ditoy ciudad ti Laoag a napan nangkita iti sitwasyon ti balayda a naapektaran ti napigsa nga alipugpog.
