LAOAG CITY – Inbatad ni Brgy. Chairman Erwin Ruiz iti Barangay 15, San Roque iti ili ti Bacarra nga awan dagiti makitkita da nga agsusugal iti pagtaengan ti maysa a kabarangayan da.
Inadmitir ti kapitan nga iti kallabes ket adda ti mapaspasamak a panagsusugal iti nasao a balay, ngem inkalintegan na a daytoy ket paglinglingayan da laeng a sangapamilia.
Nupay kasta, kalpasan ti pannakasita ti nasao a pamilya ket awan metten dagiti makitkita da nga agsusugal iti nasao a balay.
Innayon na a kanayun met ti panagpatrolya da iti lugar ken marigatan da a mangkita iti uneg ti balay gapu ta nangato ti alad na.
Immuna iti daytoy, nagturong ti news team ti Bombo Radyo Laoag iti pagtaengan ti mismo a mairekreklamo a balay ngem matmaturog paylaeng ti agtagikua iti dayta a gundaway, maibasar iti kadkadwa da iti pagtaengan.
Kabayatanna, nagkedked paylaeng a mangipaay ti komento na ti chief of police iti ili ti Bacarra mainaig iti nasao nga isyu.
