LAOAG CITY – Naminpinsan a dimmapo ti maysa a balay a kukua ni Pacita Asuncion iti Barangay Loing iti ili ti Piddig.
Daytoy ti inbatad ni Senior Fire Officer I Jay-Are Toribio, ti chief Investigator iti Bureau of Fire Protection iti ili ti Piddig.
Kuna ni Toribio nga alisto a nagkayamkam ti apoy gapu ta malaksid a napigsa ti angin ket arigna na naaramid amin iti light materials ti balay.
Inbatad na a sakbay iti napasamak nga uram ket adda dagiti nakakita ken ni Asuncion a nagsagsagad iti paraangan na ken rumrumuar a nagpuur kadagiti basura na, ngem daytoy ti naiget nga im-imbestigaren da no isu ti nangitunda iti insidente.
Innayon na a saan da pay a maibaga no mano amin ti balor dagiti nadadael gapu ta manarimaan paylaeng ti imbestigasyon da.
Inpalgak na pay a rumrumuar a ti akinkukua iti balay ket maipagarop a mapukpukaw na ti simbeng iti panunot na.
Mainaig iti daytoy, inpakaammo ni Toribio a naiyaramidan ni Asuncion ti kubo-kubo a pagnaedan na kalpasan a nauram ti balayna ken awan pulos ti nasalbar na a gamitna.
Kabayatanna, inrakurak ni Toribio a sakbay ti panagresponde da iti pannakauram ti balay ni Asuncion ket immuna a napan da nagresponde iti napasamak a grassfire iti paset ti Barangay Abucay iti metlaeng nasao nga ili.
Kuna na nga umabot iti uppat nga ektarya ti naapektaran iti napasamak a grassfire iti nadakamat a lugar.
