LAOAG CITY – Nauram ti sumagmamano a paset ti maysa a balay iti Barangay 4 iti ili ti Banna.
Segun ken ni Senior Fire Officer 4 Jay Simbol, ti fire marshall iti Bureau of Fire Protection iti ili ti Banna, ti kangrunaan a nauram ket ti attic ken ti storage room.
Kuna na a dagus da met a nakapagresponde ken nagkiddaw da pay ti tulong ti Bureau of Fire Protection iti ili ti Nueva Era ken iti ili ti Marcos no sadinno a kalpasan ti sumuruk-kumurang a 23 a minuto ket naan-anayen a nasebseban da ti apoy.
Inlawlawag ni Simbol a ti balay ket manmano dagiti mapan matmaturog gapu ta daytoy ket manarimaan ti pannakatarimaan na ken daytoy ket naaramid ti kaadoan a paset na ti light material.
Innayon na a dagiti akin-balay ket adda ti pinaaramid da a sabali a pagnanaedan da ngem iti metlaeng mismo nga abay ti nauram a daan a balay.
Mainaig iti daytoy, kuna ni Simbol a mapatta-patta nga umabot iti sumuruk-kumurang a 160 a ribo a pisos ti balor dagiti nadadael, ngem possible a maipangato wenno maipababa daytoy agdepende iti agbalin a palawag to dagiti akinbalay.
Inrakurak ni Simbol a ti kitkitaen da a possible a nangrugyan ti uram ket ti electrical wiring aglalo ket daan unayen ti nasao a balay.
Iti agdama, agtultuloy ti imbestigasyon ti Bureau of Fire Protection mainaig iti napasamak nga uram iti ili ti Banna.
