LAOAG CITY – Nakigtot dagiti tallo a residente kalpasan a nakita da ti rurug ti maipagarop a maysa a babai iti kabanbantayan a paset ti Barangay 23 iti ili ti San Nicolas.
Inbatad ti maysa a kadagiti nakakita ti rurug a ni Elimar Bonilla a kabayatan ti papanda panagala ti u-ong ket nakigtot da idi makita da ti rurug.
Inadmitir na a nabayagen nga adda ti maang-angot da a nabangsit iti lugar ngem inpagarop da a daytoy ket natay laeng a taraken.
Segun met kadagiti dadduma a residente iti lugar, Abril pay laeng idi adda ti maang-angot da a nabangsit ngem saanda nga inpagarop a daytoy ket maysa a tao.
Iti agdama, agtultuloy ti imbestigasyon dagiti otoridad mainaig iti daytoy a pasamak.
