LAOAG CITY – Nakita a tumtumpaw iti fishpond iti paset ti Barangay Binsang iti ili Pasuquin ti maysa a lalaki.
Binigbig ni Police Lt. Bjay Calivoso, ti chief of police ti PNP-Pasuquin ti biktima a ni Dominador Villanueva, agtawen ti 58, awanan ti asawa, maysa a mannalon ken residente iti nasao a barangay.
Segun kenni Calivoso, adda ti nagreport kadakuada nga adda ti nakita da a bangkay iti nasao a fishpond.
Gapo iti daytoy, kunana a dagus da a nagturong iti lugar kadua da ni Dr. Jiophantos Acob, iti RHU Pasuquin ken naduktalan a ti nakakita ket ni Jonel Rivera, addaan ti legal nga edad, mangngalap ken residente iti Barangay Naglicuan iti nasao nga ili.
Iti imbestigasyon pay ti PNP, mapan kuma agkalap ni Rivera iti fishpond idi nakita na ti agtatapaw a lalaki.
Inlawlawag na a ti biktima ket maipagarop a kanayon nga agin-inom ti nasanger, ngem awan met dagiti nakariri na.
Inbatad na nga iti papan ti biktima iti fishpond, agarop 150 a metro ti kaadayo na manipud iti pagtaengan daytoy ket posible nga immatake ti sakit na.
Innayon na a naudi a nakita ti biktima idi Abril 15 ken posible nga iti dayta nga aldaw ket napasamak daytoy.
Naamoan a basar iti eksaminasyon nga inyuswat ni Dr. Acob, awan ti nakita na nga anyaman a sugat wenno senyales a nadangran ti biktima.
Agtultuloy met ti imbestigasyon tapno maamoan no anya ti rason ti nakatayan ti biktima.
