LAOAG CITY – Nakigtot ti maysa a mannalon a ni Mr. Henry Visitascion iti Barangay Tambidao iti ili ti Bacarra gapo iti pannakakita na ti bangkay ti lalaki a nakadasay iti kataltalonan.
Nabigbig daytoy a ni Mr. Delfin Legazpi, awanan asawa ken residente met laeng iti nadakamat a barangay.
Segun kenni Visitascion, mapan na kuma bisitaen dagiti bunubon na idi nakita na a nakapakleb a lalaki nga adda iti abay ti natulid a motorsiklo iti kataltalonan.
Gapo iti daytoy, dagus na nga inpakammo iti Police Assistance Center iti nasao nga ili.
Mainaig iti daytoy, kuna ni Police Major Rommel Ramos, ti chief of police ti PNP-Bacarra a basar iti inisyal nga imbestigasyon da ket naggapo ni Legazpi iti Barangay Lubong iti ili ti Vintar ken nagatendar ti maysa a pasken ken agawid kuma idi napasamak ti insidente.
Inlawlawag ni Ramos a mabalin a napaspas ti panagpataray ni Legazpi iti motorsiklo na basar met laeng iti nakita da nga skid mark iti kalsada ken posible a nagpreno.
Kunana nga imbes nga agpakannigid kuma iti kalsada ket nagderderetso a nangitunda ti pannakaitapwak na iti kataltalonan.
Kunana a makitkita da a ti posible a nangitunda ti ipapatay ni Legazpi ket gapo iti pannakalumlum ti rupa iti kataltalonan kalpasan a naawanan ti puot.
Naamoan nga idi napasamak ti insidente ket iti nagbaetan ti 9:30 agingga iti 10:00 idi rabii idi napasamak ti insidente ken itay laeng bigat a nakita ti nasao a bangkay.
