LAOAG CITY – Nasarakan ti nalamiisen a bangkay ti maysa a lalaki iti maysa a karayan iti Barangay 62-B, Navotas ditoy siudad ti Laoag.
Daytoy ket agtawen ti 26, naasawaan, ken residente iti isu met laeng a lugar.
Basar ti inisial nga impormasion, napan ti biktima iti pagtaengan dagiti nagannakna iti Barangay Pila iti siudad idi Agosto 22, ken saanen a nagawid.
Idi agarup 7:30 ti rabii ti Agosto 23, napan sinarak ti agtawen 28 a katugangan ti biktima daytoy gapu ta saan pay a nagawid ket kabayatan ti panagsarakna, nakitana ti motorsiklo ti biktima iti paset ti karayan iti Sitio Kasabaan iti Barangay 62-B iti nasao met laeng a siudad.
Insigida met a naiwayat ti panagsarakda iti biktima iti karayan ket apaman a nasarakan daytoy, awanen ti biagna ken nakapakleb daytoy iti pitak iti nasao a karayan.
Naitaray ti biktima iti Provincial Hospital iti babaen kadagiti nagresponde a kameng ti Bureau of Fire Protection.
Mainaig iti daytoy, naisayangkat ti post-mortem examination ti bangkay ken naduktalan nga iti ipapatayna ket asphyxia secondary to suffocation gapu iti submersion injury.
Mapattapatta a maysa nga oras pay laeng a natay ti biktima sakbay ti pannakasarakda kenkuana.
Segun kadagiti kabagian ti biktima, addan pakasaritaan ti panagatake ken napadasan ti seizure attack bayat ti panagmulana iti pagay sakbay a napasamak ti insidente.
