LAOAG CITY – Kinumpirmaran ni Barangay Chairwoman Marilyn Resquir iti Barangay Cabungaan A ditoy ciudad ti Laoag a kagawad na ti maysa a babai a natiliw babaen kadagiti kameng ti Philippine National Police gapu iti maipagarop a vote buying.
Inbatad na a nadamag na laeng ti nasao nga insidente babaen metlaeng kadagiti dadduma a kagawad na.
Segun ken ni Resquir, maladingitan iti pannakatiliw ti maysa kadagiti kagawad na uray saan da nga agpapada ti supsuportaran a kandidato ita a panawen ti eleksyon gapu ta isuna ti pannakaina da.
Kabayatanna, inlawlawag ni Police Lt. Col. Andrew Rabang, ti chief of police ditoy ciudad ti Laoag a nakaawat da ti report nga adda ti mapaspasamak a maipagarop a vote buying kangrunaan na iti tianggi ti nasao a kagawad.
Gapu iti daytoy, kuna ni Rabang a napanda inberipikar ti report ket ditoyen a nakita da dagiti naruay a motorista nga agturturong iti tianggi ti nasao a kagawad.
Innayon na nga idi makita dagiti nakamotorsiklo dagiti kameng ti pulisya ket nagtalawen dagitoy iti nadakamat a lugar.
Mainaig iti daytoy, kuna ni Rabang nga adda dagiti nakumpiskar dagiti lugar a sample ballots nga adda ti ladawan ti kandidato ken kwarta na.
