LAOAG CITY – Kritikal ti kondisyon ti maysa a lalaki a nangiturong ti motorsiko a Suzuki Raider 150 kalpasan a nadesgrasya iti paset ti Sitio Caboloan, Brgy. 22 iti ili ti Sarrat.
Binigbig ni Police Staff Sergeant Mark Anthony Raciles ti Imbestigador ti PNP-Sarrat ti biktima a ni Mike Alwin Agno y Dapa, agtawen ti 22, awanan asawa, awanan trabaho ken residente iti nadakamat a lugar.
Inpakaammo ni Raciles a basar iti naiysuwat nga imbestigasion, bayat nga agpapalaud ti biktima ken apaman a nadanon na ti kurbaan a paset ti kalsada ket dita a na-overshoot ti bangir a linya.
Kunana a gapu iti daytoy, naidungpar ti biktima iti poste iti shoulder barrier nga adda iti abagatan ti kalsada.
Inbatadna a gapu iti kinapigsa ti impact ti desgrasia ket nagsagaba ti biktima ti nakana a sugat iti ulo, sumagmamano a paset ti bagi na ken natukkol pay ti akinkannigid a saka daytoy.
Inbagana a dagus a naitaray iti Governor Roque Ablan Sr Memorial Hospital ti biktima.
Kabayatanna, agpapan a maisursurt ti damag ket inpakaammo ti imbestigador a basar iti pamilya ti biktima ket manamnama a maiyakar daytoy iti Mariano Marcos Memorial Hospital and Medical Center iti siudad ti Batac.
Naamoan nga awan ti suot nga helmet ti biktima idi napasamak ti desgrasya ken adda iti impluwensya ti nasanger.
