LAOAG CITY – Nagsagaba ti sugat iti nagduduma a paset ti bagi ti maysa a baro kalpasan a nabagko-bagkong iti paset ti Barangay 35, Bil-loca iti ciudad ti Batac.
Nabigbig ti biktima a ni Don Moen Puyot, agtawen ti 24, awanan ti asawa ken residente iti Barangay Rayuray idinto a ti suspek ket ni Klye Ryan Ganitano, addaan ti umno nga edad ken residente met iti Barangay Barani iti met laeng ciudad ti Batac.
Segun kenni Police Lt. Col. Gerome Wangkey, ti hepe ti Philippine National Police iti ciudad ti Batac, nagreport kadakuada ti agnagan ti Isaac a residente iti Brgy. Baay mainaig iti pammagkong iti Brgy. Bil-loca partikular iti maysa a pasken.
Inbatad na nga iti inisyal nga imbestigasyon da, naggi-inom ti grupo ti biktima ken suspek iti maysa a birthday party iti pagtaengan ni Jhay Mangabat, agtawen ti 23.
Inlawlawag na a ditoy a timpuar ti saan a panagkinnaawatan ti agnagan ti Angelo Mark Lapat ken Calvin Klean Antonio.
Gapo iti daytoy, tinawagan ni Angelo Mark ti kasinsin na a ni Puyot nga isu met ti biktima kasta met a timmawag ni Calvin Antonio iti grupo na.
Kabayatan ti panagdinnanog da Calvin Klean ken Angelo Mark ken ginandat ni Puyot ti aganawa ngem dita metten nga inruar ti suspek a ni Kyle Ryan ti balisong na ken ditoy a binagko-bagkong na ti biktima iti sumagmamano a daras.
Nagsagaba ti sugat iti nagduduma a paset ti bagi ti biktima ken dagus a naitaray ti Mariano Marcos Memorial Hospital and Medical Center iti ciudad ti Batac idinto a ti suspek ket naglibas a nakamotorsiklo ken tugot na ti inusar na a balisong.
Innayon na a ti nasao nga insidente ket gapo iti impluwensya ti nasanger.
Kabayatanna, agtultuloy met ti imbestigasyon dagiti otoridad mainaig iti nasao a pammagkong ken ti pannakaipila ti kaso ken pannakabirok ti suspek.
