LAOAG CITY – Kinumpirmaran ni Police Captain Johnveil Maramag, ti chief of police ti PNP-Marcos a pimmusay ti biktima ti desgrasya iti Barangay Valdez iti nasao nga ili.
Binigbig ni Maramag ti biktima a ni Marlon Joshua Dumlao, agtawen ti ken 19, baro ken residente iti Barangay Lydia iti nadakamat met laeng nga ili.
Segun kenni Maramag, napan nakiinom ti biktima ket bayat ti panagmaneho na ket saan na a nakontrol ti manibela ken naidungpar iti puon ti marunggay ken timmama pay iti poste ti kuryente.
Kunana a gapo iti kapigsa ti impact ti desgrasya ket nagsagaba ti nakaro a sugat iti ulo ti biktima ken naitaray iti ospital ngem naideklara a dead on arrival.
Inbatad ni Maramag a basar kadagiti nakakita ket napaspas ti panagpataray ti biktima ken nakita da a napalaos ti bartek daytoy.
