LAOAG CITY – Natay ti maysa a baro kalpasan a tinagtagbat ti bukod na nga ama iti Brgy. Sta Cruz, Currimao, Ilocos Norte.
Nabigbig ti biktima a ni Herbert Menor, agtawen ti 37, awanan ti asawa, construction worker, idinto a ti suspek ket ni Nestor Menor y Labancoc, agtawen ti 65 ken residente iti nadakamat a barangay.
Iti inisyal nga imbestigasyon dagiti otoridad, sakbay ti insidente, nabartek a nagawid ti biktima ken naaddaan da ti nabara a panagsinnungbat iti ama na.
Kalpasan ti sumagmamano a minutos, nangala ti suspek ti buneng ken kellaat nga intagbat na iti tengngd ken abaga ti biktima.
Dagus a naitaray ti biktima iti Mariano Marcos Memorial Hospital and Medical Center iti ciudad ti batac ngem naideklara a dead on arrival.
Kabayatanna, natiliw met ti suspek babaen kadagiti nagresponde a kameng ti pulisya ken iti agdama ket adda iti kustudiyar ti Philippine National Police pakairamanan ti buneng a nausar iti insidente.
