LAOAG CITY – Balligi a natiliw ti maysa a baro kalpasan ti panangitaray na ti 30 a pisos iti Barangay Naglicuan iti ili ti Pasuquin.
Nabigbig ti suspek a ni Jordan De Guzman y Saturno, agtawen ti 19, awanan ti asawa, tubo iti Burgos, La Union ken agdama nga agnanaed iti San Pedro, Mabini, Batangas.
Basar iti Philippine National Police iti ili ti Pasuquin, iti 1:30 ti parbangon ti Mayo 4, nagreport kadakuada ti biktima a ni Carlito Padilla y Gagarin, agtawen ti 38, naasawaan ken residente iti Brgy. 14 Ester iti ili ti Vintar kadua na ni Ismael Duyao gapo iti panangtakaw ti suspek ti kwarta da.
Inbatad ni Police Major Julius Basallo, ti chief of police ti Philippine National Police iti ili ti Pasuquin, nakilugan ti suspek ken ti maysa a menor de edad iti paset ti Gerona Tarlac ken agturong iti Burgos, La Union.
Inlawlawag na a ti kaadda da iti dalan, nagkiddaw ti suspek kadagiti biktima nga agaplikar ti trabaho iti junkshop a pagpapaayan dagiti biktima ken inawat met ti employer dagiti maseknan daytoy babaen iti tawag iti cellphone.
Naamoan a nagperdiyan ti truck iti ili ti Badoc rason a nailugan manen dagiti dua iti kam-ammo dagiti a taga Bangui ken idi adda da iti Pasuquin ket naggasolina da.
Nupay kasta, idi agbayaden ti driver ket nadlaw nan nga awanen ti 30 a ribo a pisos a naipan iti folder ken saan da a mabirukan ti suspek ken ti ubing.
Gapo iti daytoy, inbatad na nga inalerto da ti barangay ken dagiti kakadua da ken binirok da ti suspek agingga a nakita iti likod ti maysa a convenience store iti ili ti Pasuquin ken natiliw daytoy.
Narekobre iti suspek ti nabati a kwarta nga intaray na a nasurok 29 a ribo a pisos laengen gapo ta dagiti dadduma ket ingatang na ti arak ken kanen na.
Mainaig iti daytoy, kunana a sakbay ti pannakatiliw ti suspek ket adda ti nagturong iti PROTECT box da iti Barangay Poblacion para iti pannakai-turn over ti maysa nga ubing a pinanawan ti kadua na nga isu ti natiliw a nagtakaw.
Segun kenni Basallo, inbatad ti ubing nga inbati isuna ti kadua na rason a timmawag ti pulisya kadagiti nagannak ti ubing iti Mabini, Batangas ken nakumpirmaran a ti nasao nga ubing ket mapukpukaw idi Abril 23.
Naduktalan dagiti otoridad a ti suspek ket dayo met laeng idiay Mabini, Batangas ken ti inpakada na ket itugot na ti ubing tapno alaen ti sweldo na agingga a nakadanon da ditoy probinsya.
Iti agdama, ti suspek ket adda iti kustudiyar ti Philippine National Police iti ili ti Pasuquin ken maisagsaganan ti kaso a maipila kontra kenkuana.
