LAOAG CITY – Nakalibas iti maikalima a gundaway ti maysa a baro nga adda iti salinong ti Bahay Pag-asa iti Brgy. 48-A Cabungaan ditoy siudad ti Laoag.
Basar iti inisyal nga impormasyon, maipagarup a napan immisbo ti naka-duty a Civil Security Unit personnel idi ginundawayan ti baro nga aglibas.
Kabayatanna, kuna ni Mrs. Fe Respicio, monitoring social welfare iti Bahay Pag-asa, mismo nga iti gate ti nagruaran ti nasao nga indibidual.
Gapu iti daytoy, inpasigurado na nga ikarigatan da a mabirok ti naglibas nga indibidual gapu ta manarimaan ti pannakaiproseso dagiti dokumento na tapno maiyakar iti pasilidad.
Adda metten ti rekomendasyon ti Civil Security Unit ken ni Mayor Michael Marcos Keon a maiyakar ti personnel a naka-duty iti Bahay Pag-Asa.
Maipalagip a ti nasao nga indibidual manipod iti ili ti Piddig ket naipan iti Bahay Pag-asa gapu iti panagsalungsing na ti RA 9165 wenno Dangerous Drugs Act of 2002 ken menor de edad pay laeng iti dayta a gundaway.
Nu pay kasta, masansan nga aglibas manipod iti nasao a pasilidad ken iti naudi ket nabirokan idiay Caloocan City.
