LAOAG CITY – Nagkiddaw ti maysa a mangalap iti Barangay Davila, ili ti Pasuquin iti tulong pinansial.
Daytoy ket kalpasan a nagbaliktad ti bilog a naglugan ni Marvin Basco a kaduana ti ub-ubing a kabsatna kalpasan a dinungpar daytoy ti napigsa nga angin ken dalluyon ti taaw.
Inlawlawag ni Basco nga agarup alas kuatro ti parbangon idi Pebrero 14 a pimmanawda ken nagturong da iti taaw tapno agkalap a kaduada ti dua a komboyda.
Kinunana, nga idi damo ket kalmado ti baybay ngem idi addadan iti tengngana ket ditoy a pimmigsa dagiti dalluyon ti taaw.
Segun kenkuana, awan ti nagresponde a rescuer gapu ta awan ti signal iti lugar a nakapasamakan ti insidente, isu a dagiti laeng dua a kaduada ti timmulong.
