LAOAG CITY – Nauram ti maysa a bodega iti Brgy. 28 ditoy siudad ti Laoag.
Segun ken ni Senior Fire Officer 2 Elmar Acob, ti Imbestigador iti Bureau of Fire Protection ditoy siudad, nabigbig ti akinkukua ti nauram a bodega a ni Sangguniang Panlungsod Member Enrico Ang.
Inbatadna a basar iti insayangkatda nga imbestigasion, rumrummuar nga adda dagiti trabahador iti nasao a bodega nga agwel-welding nga isu ti atapenda a namunganayan ti napasamak nga uram.
Nupay kasta, kunana nga agtultuloy pay laeng ti imbestigasionda tapno maammoan ti makaigapu iti napasamak nga uram.
Inlawlawagna nga adda dagiti nakapenpen a sinako a bagas ken irik iti uneg ti bodega a sumagmamano kadagitoy ket naminpinsan a nauram.
Malaksid iti daytoy, inpakaammona nga adda pay ti tallo a solar panel ti nairaman a nauram.
Inpalgakna a nagpaut ti uram iti las-ud ti lima a minuto a dagusda met a nasebseban dagiti nadakamat a nauram iti uneg ti bodega.
Innayonna nga adda ti uppat a fire truck ti Bureau of Fire Protection ditoy siudad ti Laoag ti napan nagresponde pakairamanan ti maysa pay a fire truck a kukua ni Mr. Victor Ang.
Kabayatanna, naammoan nga awan ti nadangran iti napasamak nga uram ken agtultuloy ti naun-uneg nga imbestigasion no mano ti gatad dagiti nadadael gapu iti uram.
