LAOAG CITY – Nagballaag ti Food and Drug Administration iti publiko a saan a gumatang ken agusar ti produkto a Cock brand mosquito coil – microsmoke and floral perfume.
Iti pakdaar nga inparuk-at ti Food and Drug Administration, kunana nga awan ti certificate of product registration ti nasao a produkto.
Gapu ta saan pay a nakarehistro, saan a maipasigurado ti Food and Drug Administration ti epektibo, kalidad ken no natalged para iti salun-at ti tao ken ayup.
Kabayatanna, inbabawin ti Food and Drug Administration ti inruarna a ballaag kontra kadagiti skin care product a Glowrie whitening body lotion SPF 80 ken Sukee skin essentials amino cleansing water a naiyisyu pay idi Oktubre ken Disiembre ti 2023.
Naammoan a ti panangibabawi ket kagiddan metten ti panagparehistro dagiti nasao a cosmetic products ken napaneknekan a natalged daytoy iti salun-at ti tao.
