LAOAG CITY – Intudo ti maysa a menor de edad ti maysa a Barangay Kagawad iti ili ti Paoay a maipagarop a nangmolestiya kenkuana Marso 17, 2021, Miyerkules iti agarop alas-tres ti malem.
Daytoy ti kinumpirmaran ti mismo ni Mrs. Hilda Macoco Tolentino, ti ikit ti biktima a menor de edad.
Segun kenni Tolentino, idi Marso 16 ket nakita na a simrek ti maitudtudo a suspek iti balay ti biktima ken gapo ta simrek manen iti aldaw ti Marso 17 ket sinurot na ken ditoy a nakita na a nakaparintumeng ti lalaki iti sangwanan ti nakaidda a menor de edad.
Gapo iti daytoy, kunana a nagikkis ken nakapungtot ken idi napan iti mismo a pagtaengan da ket simmaruno ti suspek no sadinno nga inbaga ti babai a mapan na laeng ti damagen ti signal iti menor de edad.
Kalpasan daytoy, kinasarita ti in-inauna a kabsat ti biktima ti menor de edad ken ditoy a naduktalan da a nagaraw ti suspek ti balasitang.
Kunana a basar iti biktima ket saan a daytoy ti ummuna a gundaway a maipagarop a namolestiya ti balasitang.
Mainaig iti daytoy, idi nagsasarita da kadwa da ti suspek ket inadmitir na a ginaraw na ti barukong ti biktima ngem kontra daytoy iti testimonya ti balasitang gapo ta rumrumwar a ti ramay ti lalaki ti inserrek na iti mabagbagi ti menor de edad.
Inlawlawag na a saan a pulos a nagibagbaga ti biktima kadakuada iti mapaspasamak kenkuana.
Inpetteng na nga iti laksid a nagpakawan ti suspek ket desidido da a mangipila ti kaso kontra iti madakdakamat a kagawad.
