LAOAG CITY – Bimtak ti bulkan iti abagatan a laud ti Iceland iti maikalima a gundaway sipud idi Disyembre iti napalabas a tawen.
Daytoyen ti maibilang a kagrabean a panagbettak ti bulkan sipud nagbalin nga aktibo, addan tallo a tawen ti napalabas.
Nagballaag dagiti otoridad maipapan iti peggad ti napabaro nga aktibidad ti bulkan iti lugar a masarakan iti abagatan laeng ti kabisera a Reykjavik kalpasan a naduktalan iti panagadal a naurnong ti magma iti uneg ti daga.
Mainaig iti daytoy, inpakaammo ti Icelandic Meteorological Office a dimmanon ti lava fountains iti 50 metro a kangato ken agarup 3.4 a kilometro ti kaatiddog ti fissure iti asideg ti Sundhnuksgigar, amianan ti Grindavík.
Maipalagip a kaadoan kadagiti 4,000 a tattao a residente iti ciudad ti Grindavík ket permanente a naibakwit idi Nobyembre iti napalabas a tawen sakbay a nangrugi dagiti panagbettak ti bulkan.
