LAOAG CITY – Naminpinsan a dimmapo ti maysa a bunggalo a pagtaengan iti Sitio 6, Taguiporo iti Brgy. 23 iti ili ti San Nicolas kalpasan a nauram.
Segun ken ni Senior Inspector Edison Reyes, Municipal Fire Marshal, ti Bureau of Fire Protection iti ili ti San Nicolas, basar iti insayangkatda nga imbestigasion ket agarup pasado ala una ti malem ket nakaawatda ti tawag manipod iti Philippine National Police iti nasao nga ili nga adda ti mapaspasamak nga uram.
Gapu iti daytoy, inbatadna a dagus a napan nagresponde dagiti dua a firetruck iti nakapasamakan ti uram no sadino kabayatan iti panagturong dagitoy iti lugar ket naipasungad kadakuada ti napuskol nga asok.
Kunana a nabigbig ti agtagikua ti balay a ni Mr. Christopher Madamba Pamplona, naasawaan ken addaan ti dua nga annak nga agtawen ti innem ken uppat.
Inlawlawagna nga idi napasamak ti uram ket awan dagiti agasawa ken dagiti dua laeng nga annakda ti nabati.
Inpalgakna nga idi mangrugi ti uram ket dagus a nagtartaray a rimuar dagiti dua nga ubbing pakairamanan ti maysa pay nga ubing nga agpukpukkaw nga adda ti uram.
Inbatadna a maibasar iti pannakisarsaritana iti inaudi kadagiti agkabsat ket inpurwak ti inauna a kabsatna ti lighter a nakasindi iti foam ti pagtugawan nga adda iti ruar ti pagtaenganda.
Mainaig iti daytoy, inpakaammo ni Reyes nga alisto a nagramram ti apoy gapu ta naaramid ti pagtaengan iti light materials, adda dagiti nakapenpen a ligay ken naangin kadayta a gundaway.
Innayonna nga umabot iti 50 a ribu a pisos iti gatad ti pannakadadael ti nauram a pagtaengan.
Immuna iti daytoy, nagtitinnulong dagiti agkakarruba tapno dagus a masebseban ti apoy ken maliklikan nga adda ti mairaman pay a balay a mauram.
Kabayatanna, naammoan nga aglawa ti 6 by 8 ti kalawa ti balay ken naideklara a fire out ti uram kalpasan iti uneg ti 20 a minuto.
