LAOAG CITY – Balligi ti naisayangkat a search warrant operation iti Barangay 2 ditoy ciudad ti Laoag.
Nabigbig ti subject ti operasyon a ni Severino Joaquin y Abian aka “Rino”, maysa a barangay tanod iti nadakamat a barangay.
Ti search warrant ket inparuk-at ti Regional Trial Court, First Judicial Region iti Bauang, La Union.
Nasukimat dagiti kameng ti PNP-Laoag ti maysa a caliber 22 a paltog nga addaan ti 15 a bala a naipan iti nangisit a pouch ken naiparabaw iti durabox.
Mainaig iti daytoy, inpetteng ni Joaquin a dagiti ebidensya a naala kenkuana ket maipagarop a naimula gapo ta saan a pulos nga agig-iggem ti paltog.
Inpalgak na a saan na a kontraen ti search warrant operation basta masurot dagiti nasken a proseso.
Daytoy ket gapo ta basar iti palawag na, adda ti uppat agingga iti lima a pulis ti maipagarop a simrek iti uneg ti balay da.
Inpetteng na a no pudno nga adda ti ik-ikotan na a paltog ket saan na nga iparabaw iti durabox no diket idulin na.
Inlawlawag ni Joaquin nga adda ti nakariri na a prominent family nga isu ti patien na a namunganayan iti daytoy nga operasyon.
Innayon na a rumuar to met laeng iti kinapudno nga awan ti aramid na nga iligal.
