LAOAG CITY – Natay ti maysa a construction worker kalpasan a nadungpar ti motorsiklo iti Barangay 22, San Andres ditoy siudad ti Laoag.
Segun ken ni Police Staff Sergeant Alexson Rosal, Duty Investigator ti Philippine National Police Laoag Traffic Division, nabigbig ti biktima a ni Robert Salvador Mendoza, agtawen ti 51, awanan asawa ken residente iti nasao a barangay idinto a nabigbig met ti suspek a ni Edward John Tomas Guillermo, agtawen ti 21, awanan asawa ken residente iti Brgy. 2, Anao iti ili ti Piddig.
Inbatadna a basar iti insayangkatda nga imbestigasion, kabayatan a magmagna ti biktima nga agpa-daya iti nadakamat a kalsada ket kellaat a nadungpar ti motorsiko a Honda Click 125 nga awanan ti plate number ken agmaris ti blue nga agturong met iti kapada a direksion.
Gapu iti daytoy, inlawlawagna a nagsagaba ti nakana a sugat iti ulo ti biktima a dagus a naitaray iti Governor Roque Ablan Senior Memorial Hospital ngem naideklara a dead on arrival babaen iti Attending Physician a ni Dr. Frankie Albano.
Kunana a naikabil met iti nasao a balay-pagagasan ti suspek babaen dagiti nagresponde a Philippine Red Cross Personnel para iti pannakataming dagiti sinagabana a sugat.
Innayonna nga awan ti naipakita a lisensia ti nangiturong iti motorsiklo ken nagpositibo daytoy iti alcoholic breathe test analyzer.
