LAOAG CITY – Natiliw iti drug buy-bust operation ti maysa a dati nga OFW a ni Keil Gretchen Respicio y Mallo, agtawen iti 33, baro ken taga Barangay 23 ditoy ciudad ti Laoag.
Malaksid ti maysa a sachet a maipagarop a naglaon ti shabu nga inlako ni Respicio iti nagpammarang a poseur buyer ket nakakumpiskar pay dagiti otoridad ti innem a sachet a naglaon ti maipagarop a shabu.
Malaksid ti daytoy, naala pay iti ikot ni Respicio ti sangaribo a pisos a marked money, kwarta na a 840 a pisos, lighter ken cellphone.
Inadmitir ni Respicion a nagus-usar ti illegal a droga, addan sumagmamano a tawen ti napalabas, nabayagen a nagbalbaliw.
Innayon na a kalpasan ti panagturong na idiay abroad ket naminpinsanen na a tinallikudan na ti illegal nga aramid na.
Inpetteng na a saanna nga ammo no naggapoan dagiti illegal a droga a nakumpiskar dagiti otoridad.
Kabayatanna, natiliw met ni Cesar Jun Pisaro, construction worker, taga Vintar, Ilocos Norte iti naiyuswat a drug buy-bust operation iti paset ti Barangay 23 ditoy ciudad ti Laoag.
Naala iti ikot ni Pisaro ti uppat a sachet a naglaon ti maipagarop a shabu ken ti sangaribo a pisos a buy-bust money.
Nupay kasta, inpetteng ni Pisaro a saanna nga ammo no naggapoan dagiti nakumpiskar dagiti otoridad gapu ta saan nga aglaklako ken agus-usar iti illegal a droga.
Innayon na a napan iti lugar tapno mapan koma agayab kadagiti agubra ti construction idi tiniliw da daytoy.
Mainaig ti daytoy, inbatad ni Barangay Chairman Jay Ramos iti nasao a barangay a mabalin a maymaysa a grupo da Pisaro ken ti immuna a natiliw a ni Keil Gretchen Respicio y Mallo.
Innayon ni Ramos a possible a ni Pisaro ti katran-transaksyon ni Respicio sakbay a natiliw.
