LAOAG CITY – Nagballigi dagiti kameng ti Philippine National Police a nangarestar ti maysa a lalaki iti insayangkat da nga anti-illegal drug buy-bust operation iti paset ti Madongan Dam iti ili ti Marcos.
Segun ken ni Police Major Jonevale Maramag, ti chief of police iti ili ti Marcos, ti suspek ket agtawen ti 25, construction worker ken residente iti Barangay Cacafean iti nasao nga ili.
Segun ken ni Maramag, malaksid iti 5 a sachet a naglaon ti maatap a shabu ken ti 3 a plastic residue, ket nakakumpiskar da pay ti maysa a caliber 22 a paltog.
Kuna na a nabayagen a monmonitoren da ti suspek a maibilang kas Street Level Individual sakbay nga insayangkatan da ti operasyon.
Innayon na a dagiti metlaeng immuna a natiltiliw da gapu iti illegal a droga ti nangibutaktak ti nagan ti suspek isut gapuna a minonitor da a naimbag daytoy.
Saan metten a dinakamat pay ni Maramag ti eksakto a lugar a pagal-alaan ti suspek ti ilaklako na a maipagarop a shabu ngem inpasigurado na nga iti sabali nga ili wenno probinsya.
Mainaig iti daytoy, inbatad ni Maramag a ti rason ti suspek no apay nga adda ti iggemna a paltog ket pangsalaknib na laeng ti bagina aglalo ket adda dagiti gundaway nga agbibiyahe ti rabii.
Iti agdama, nagtalinaed ti suspek iti Philippine National Police iti ili ti Marcos ken napilaanen ti kaso a panaglabsing ti Republic Act 9165 wenno Comprehensive Dangerous Drugs Act of 2002 ken ti panaglabsing ti Republic Act 10591 wenno Comprehensive Firearms and Ammunition Regulation Act kontra kenkuana.
