LAOAG CITY – Natay ti maysa a construction worker kalpasan a nakuryente iti patpatakderen da a balay iti Barangay 7-A ditoy ciudad ti Laoag.
Binigbig ni Police Lt. Col. Joseph Baltazar, ti chief of police ditoy ciudad ti Laoag ti biktima a ni Allyson John Domingo, agtawen ti 22, addaan ti live-in partner ken residente iti Brgy. 1 iti ili ti San Nicolas.
Inbatad na nga iti imbestigasyon ti Philippine National Police ditoy ciudad ti Laoag, kabayatan ti panangiplastar ti biktima ti scaffolding iti patpatakderen da a balay ken aksidente a nasagid na ti livewire a nangitunda ti pannakatennag na iti kangato nga agarop 15 a kadapan.
Naitaray ni Domingo iti Governor Ablan Senior Memorial Hospital ditoy ciudad ti Laoag ngem naideklarar a pimmusayen gapu kadagiti sinagaba na a nakana a sugat iti nagduduma a paset ti bagina.
Kabayatanna, nagpalagip ni Baltazar kadagiti construction workers a masapol nga agsuot da ti protective gear kangrunaan na no nangangato dagiti patpatakderen da a balay wenno pasdek.
