LAOAG CITY – Sumango iti kaso a theft ti maysa a construction worker kalpasan a maipagarup a nagtakaw ti uppat kalding iti ili ti Marcos.
Basar iti report, napan nagreklamo ti biktima a ni Melanio, agtawen ti 51, addan ti live-in partner, maysa a mannalon ken residente iti Sitio Sadiri ti Brgy. Daquioag iti nadakamat nga ili iti Philippine National Police kontra iti suspek a ni Hector Delos Reyes, agtawen ti 49, addaan iti live-in partner, construction worker, tubo manipud iti Sitio Saranay, Brgy. Caribquib iti ili ti Banna ken agdama nga agnanaed iti Sitio Bannuar ti Brgy. Daquioag iti ili ti Marcos a mapapati a nagtakaw iti uppat a kalding nga aggatad iti P17,500.
Mainaig iti daytoy, babaen iti inwayat nga imbestigasion dagiti otoridad, iti oras ti ala-sais ti bigat simmangpet ni Melanio iti nakaiyapanun dagiti kaldingna a 500 metro laeng ti kaadayona manipud iti pagtaenganna ket nakitana a mapupukaw metten ti uppat a kaldingna rason a nagsapol dagitoy.
Gapu iti daytoy, dagosna nga imbaga iti annakna daytoy tapnu i-post online agingga nga adda ti timmawag kenkuana a maysa kadagiti gimmatang iti mapukpukaw a kaldingna iti balor a P5,500 iti Brgy. 10 iti ili ti Sarrat ken kinumpirmaranda a ti suspek ti nangilako kadakuada.
Kabayatanna, naammaon a ti rason ti suspek nga apay a naaramidna ti krimen ket gapu iti rigat ti biag.
