LAOAG CITY – Rigat, saan a pannakaturog iti nasayaat, panagbisin ken panagkalikagom nga agbalbaliw ti rason no apay a simmuko wenno nagsubli iti salinong ti gobierno ni Ka Tonton manipud iti rebelde a grupo nga New Peoples Army.
Ni Ka Tonton ket agtawen ti 52 ken residente iti Barangay 7 iti ili ti Piddig.
Segun kenni Ka Tonton, kimmappeng iti NPA idi 1982 ken ti nagbalin a trabaho na ket ti panagilista kadagiti awan iti grupo a YG a bukbuklen ti nasurok 30 a miembro ken agop-operar da iti intero a probinsya ti Ilocos Norte.
Nupay kasta, kunana nga idi 1986 ket simmina met laeng iti grupo kageddan iti panangikali na ti paltog na iti lugar da, ken kalpasan daytoy ket nagturong iti Metro Manila tapno agtrabaho.
Inlawlawag na nga idi nagsubli ditoy probinsya ket adda dagiti dati a kakadua na a nangallukoy kenkuana a mapan makitaripnong para iti panangipila da ti reklamo para kadagiti biktima ti Human Rights.
Inbatad na nga idi nagdesisyon a sumuko iti Ilocos Norte Police Provincial Office ket napan na kinali ti M14 a paltog nga insuko na pay kadagiti otoridad.
Dinakamat na met a ti nakagutigot kenkuana a kumappeng iti rebelde a grupo ket ti napasaran na a riget idi babaen kadagiti soldado iti 49th IB ken no saan kuma a nagbalin a miembro ket amangan no pimmusayen daytoy.
Mainaig iti daytoy, kunana a nalag-anan ti rikna na kalpasan a simmuko gapo ta patien na a natalgeden ti kasasaad na.
Innayon na iti ili da a Piddig ket ummunan a simmuko dagiti dua a dati a kadua na ken adda pay ti dua a miembro a nabati.
Mainaig iti daytoy, ibilang ni Police Col. Christopher Abrahano, Provincial Director ti INPPO a “welcome development” iti isusuko ni Ka Tonton manipud iti rebelde a grupo nga NPA.
Segun kenni Abrahano, babaen kenni Ka Tonton ket magutigot pay dagiti dadduma a kakadua na nga agsubli met iti salinong iti gobierno.
Inbatad a ti isusuko ni Ka Tonton ket maikkan ti maikadwa a tsansa tapno nawaya a makipapulapol iti komunidad.
Inpasigurado met ni Abrahano a matulungan ni Ka Tonton para iti panagbalbaliw iti panagbiag na partikular iti livelihood programs ken ti cash assistance gapo ta adda pay ti insuko na a paltog.
Kuna na a dagiti ummunan a simmuko ket sabali nga unit ti ayan da wenno saan na a kakadua iti grupo a YG.
Kabayatanna, ginutigot na met dagiti dadduma pay a miembro ti rebelde a grupo a sumuko iti gobierno.
