LAOAG CITY – Kinumpirmaran ni Police Lt. Col. Adrian Gayuchan, ti chief of police ti Philippine National Police iti ciudad ti Batac a maysa a dati a kameng ti Communist Terrorist Group ti simmuko.
Segun kenni Gayuchan, ti agtawen ti 62 a dati a rebelde ket nakikappeng iti makakattigid a grupo idi 1989 ken ti area ti operasyon da ket iti Ilocos Norte ken Abra.
Inbatad na a basar iti maseknan, idi naldaw na a sabali ti garaw ti grupo a nakikappengan da ket naglibas ken naglemmeng agingga a naamoan ti kapulisan nga adda ti kastoy a background na.
Kunana a gapo iti daytoy ken babaen iti panangilawlawag da a sumuko ken kadagiti mabalin a benepisyo a maala na ket naalukoy da a sumuko ti maseknan daytoy.
Mainaig iti daytoy, kuna pay Gayuchan nga insuko pay ti maseknan ti paltog na.
Innayon na a kalpasan a simmuko daytoy ket naipaayan ti cash assistance ken bagas kas tulong kenkuana ket kinsarsarita dagiti adda iti religious sector.
Kabayatanna, kunana a basar iti simmuko a dati a rebelde ket adda pay ti maysa a kadua na isut gapo na nga agukkon da pay ti naan-anay nga impormasyon mainaig iti daytoy.
