LAOAG CITY – Eksklusibo nga inyistorya iti Bombo Radyo Laoag ti Grade 5 Pupil iti Pasiocan Elementary School seknan iti nakita na nga adda ti mangguyguyod iti kabsat na a Daycare Pupil.
Segun iti Grade 5 pupil, simrek da iti Nobyembre 15 iti pagadalan ngem saan na nga ammo nga awan ti klase ti kabsat na ken naamoan na laeng nga adda iti playground ti kabsat na idi inbaga kenkuana ti kaklase na.
Inlawlawag na a dagus a napan iti playground ken ditoy a naimatangan na ti panangguyod ti lalaki a nakaabungot iti kabsat na rason a binakal na ti dakkel a bato ken natamaan ti abaga ti lalaki rason a dagus a nagtartaray a rimuar iti pagadalan.
Indiskribir na a ti lalaki ket nakaabungot ti nangisit no sadinno ket mata ken ngiwat na laeng ti makita, nakasuot ti nangisit a jacket, ken naka-tsinelas ti puraw.
Kalpasan daytoy, kunana a dagus da a nagturong iti classroom da kadua na ti kabsat na ngem saan na a naibaga iti mangisursuro gapo iti buteng na.
Inbatad na nga idi nagawid da iti aldaw ket isu laeng t panangistorya na kadagiti nagannak kadakuada ti napasamak.
Mainaig iti daytoy, kuna ni Mrs. Delia Yadao, ti Daycare Worker, in-message na iti Group Chat da kadagiti nagannak nga awan ti klase iti dayta a gundaway gapo ta adda ti practice.
Nupay kasta, maipagarop a saan a napan innala ti nagannak ti ubing, ken saan na a naipakammo iti daytoy gapo ta saan nga iti uneg a mismo ti classroom da ti nangibatian na iti daytoy.
Rumrumuar a masansan a no malpas ti klase ti Daycare ket agbuya pay laeng ti ubing ken mapan iti classroom ti kabsat na.
Gapo iti napasamak, binalakadan na dagiti nagannak a saan laeng nga iti gate ti panangikabilan na kadagiti annak da no diket iti mismo a classroom da.
Kageddan iti daytoy ket nagpadespensar met ni Mrs. Yadao iti nagkurangan na iti napasamak ken mangnamnama a saanen a maulit pay.
Kabayatanna, kuna ni PTA President ti Pasiocan Elem. School ken Federated PTA President iti ili ti Bacarra Jojo Domingcil nga idi naamoan na iti rabii ti napasamak ken napaneknekan da a pudno daytoy ket dagus da a trinatar iti pagadalan ken nagreport da iti PNP.
Dinakamat na a ti maipagarop nga inbatad ti pulisya ket agpatrolya da ken mapan da iti pagadalan.
Binalakadan met ni Domingcil dagiti nagannak a saan laeng nga iti gate ti panangibatian kadagiti annak no diket iti mismo nga uneg ti classroom, ken maipadlock to metten ti gate.
