LAOAG CITY – Desidido ni Ms. Ruby Tagaban, residente iti Barangay 23 iti ili ti San Nicolas a makasarita ken mangipila ti reklamo kontra ti lalaki a nangtulpak kenkuana idi napan nagdeliver ti parcel.
Ti lalaki ket ni Mr. Borden Mahor a residente iti Barangay 24 iti ili met laeng ti San Nicolas.
Segun kenni Tagaban, napan nagdeliver ti parcel iti asawa ni Mahor isut gapo na a nagbusina iti namindua a daras ken naguni ngem awan ti rimuar.
Kalpasan ti nasurok maysa a minuto ken rimuar ni Mahor ken ditoyen a maipagarop a nagsao-sao no apay a nagbusi-busina ni Tagaban ken simungbat met ken kunana a gagangay na ti agbusina no mapan agdeliver.
Nupay kasta, maipagarop a nagtultuloy ti panagsao-sao ni Mahor agingga a naibaga na a tulpaken na daytoy.
Inpetteng met ni Tagaban a no aramiden ni Mahor daytoy ket ireport na, agingga a rimuar ti asawa ti maseknan tapno alaen ti order na ken pinagtalna na ti asawa na.
Inlawlawag ni Tagaban a saan a nagsardeng ni Mahor agingga a tinulpak na daytoy nga isu ti rason ti nakaulawan na.
Kalpasan daytoy ket napan nagreport kenni Kapitan Dennis Bonilla ken inpanamnama met ti opisyal a mangikeddeng ti panagsasarita da ken inbalakad na a mapan agpa-blotter nga isu met ti inaramid na.
Malaksid iti daytoy, kuna pay ni Tagaba a napan nagpamedical.
Naamoan a malaksid iti asawa ni Mahor ket nakita pay ti karruba da nga agub-ubra iti nadakamat a pamilya ti napasamak.
Mainaig iti daytoy, inbatad na nga adda metten ti gundaway a nagdeldeliver iti nasao a pagtaengan ken adda ti panagsao-sao ti lalaki ngem ita laeng a kastoy ti nakapamay-an na.
Kabayatanna, saanen a nangipaay ti naan-anay a komento ni Mahor ngem kunana a no makapagsarita da kenni Tagaban ken dumawat ti pammakawan.
