LAOAG CITY – Nakigtot ni Mr. Ferdinand Macugay, mangidadaulo ti Department of Public Safety ditoy siudad ti Laoag kalpasan a nakaawat ti funeral basket flower wenno sabsabong a para iti natay.
Segun kenkuana, agarup alas kuatro idi malem kalman idi adda ti nangi-deliver iti opisinada ti nasao a sabsabong.
Inbatadna a masdaaw daytoy no apay nga adda ti nangipatulod kenkuana ti nadakamat a klase ti sabsabong gapu ta awan met ti malagipna a mabalin a nakagurana wenno nakaririna iti kallabes.
Inlawlawagna a saan a napintas nga angaw ti kastoy nga aramid gapu ta maikonsiderar daytoy a pangta iti biagna.
Mainaig iti daytoy, mamati ni Macugay a napasamak daytoy kenkuana gapu iti kinaasidegna iti agdama a Local Chief Executive ti siudad.
Nupay kasta, inpettengna a saan met a makibibbibiang kadagiti aniaman nga aktibidad wenno programa nga adda ti pakainaiganna iti mapaspasangasangan a 2025 Midterm Elections.
Naammoan a ti nasao a funeral basket flower ket manipud iti maysa a flowershop ti Laoag City Public Market and Commercial Complex.
Innayonna a kalikagumna a maammoan no asino ti nag-order iti nasao a flowershop tapno mabigbig ti adda iti likudan iti daytoy a banag.
Kabayatanna, desidido ni Macugay a mangipila ti reklamo iti akin-aramid iti panangipatulod kenkuana ti sabsabong a para iti natay.
