LAOAG CITY – Nagballaag ni Doctor Alan Taylan iti publiko kontra iti panagusar ti Ivermectin a maibagbaga a makaagas kontra iti covid-19 virus.
Inlawlawag ni Doctor Taylan a ti nasao nga agas ket us-usaren dagiti veterinarian a para kadagiti igges dagiti animal.
Inbaga na nga iti laeng kallabes ket nagballaag ti Food and Drug Administration (FDA) a ti ivermectin ket saan pay a napaneknekan no makaagas kontra iti covid-19 virus.
Innayon na a basar pay iti panagadal dagiti sumagmamano nga eksperto ket saanna a napababa ti risgo ti possible a pannakatay ti maysa a pasyente ti covid-19.
Inpakaammo na sumagmamano a dakes nga epekto ti ivermectin no tumaren ti maysa a tao ket possible nga agsakit ti buksit a mangitunda ti panagbakwar wenno mabalin pay a drug poisoning.
