LAOAG CITY – Nakunviktaran ti multiple counts ti illegal a panagibunong ti opioids a pakairamanan ti oxycodone, hydromorphone ken fentanyl ti maysa a doktor manipod iti Maine.
Nabigbig daytoy a ni Dr. Merideth Norris, agtawen ti 53, residente iti Kennebunk, Maine ken agtagikua iti Addiction Treatment Center.
Basar kadagiti dokumento iti korte, nagibunong ti doktor kadagiti nasao nga agas nga awan ti legitimate medical purpose na ken naamoan a kaadoan kadagiti pasyente ket lumablaban iti pannakaigamer dan ti opioid.
Gapu iti daytoy, nakunviktaran ti doktor ti 15 counts ti panagibunong ti controlled substances ken sumango agingga iti 20 a tawen a pannakabalud iti kada count ti kaso.
Agpapan ita ket awan pay ti komento ni Dr. Norris bayat a ti recovery center na ket nakaserran.
