LAOAG CITY – Naisadsad ti maysa a dolphin iti karayan iti Barangay Caaoacan ditoy siudad ti Laoag.
Segun ken ni Mr. Jimmy Andres Sr., residente iti nasao a barangay, apaman a mapanna kitaen dagiti tarakenna a baka ket adda ti nakitana a dolphin iti nasapa ti bigat a naisadsad iti karayan.
Inbatadna nga idi maobserbaranna nga agang-anges pay laeng ti dolphin ket napanna induron tapno makasubli iti baybay.
Inlawlawagna nga inpagarupna nga insigida daytoy a tumalaw ken umadayo apaman a nagsubli iti kabaybayan.
Nupay kasta, kunana a nariparna a marigatan nga aglangoy ti dolphin gapu kadagiti sugat a sinagaba iti nagduduma a paset ti bagina.
Naammoan a sakbay daytoy a napasamak ket adda ti nakitana a dua a dolphin nga arig agay-ayam dagitoy.
Mainaig iti daytoy, naipakaammo met daytoyen iti Provincial Fishery Office tapno mataming ti nasao a dolphin.
Immuna iti daytoy, adda ti nakita dagiti residente a maysa pay a dolphin iti Barangay Navotas ditoy siudad ti Laoag ngem pimmusay daytoy.
Kabayatanna, daytoy met ti umuna a daras nga adda ti naisadsad a dolphin iti nasao a lugar.
