LAOAG CITY – Naglikudan ti maysa a farmacia ti alegasyon a saan da a mangmangted ti 20 a porsyento a diskwento kadagiti senior citizen.
Segun ti farmacia, mangted da laeng ti 20 a porsyento a diskwento no ti gatangen nga agas ti maysa a senior citizen ket agpaot iti 30 nga aldaw.
Daytoy ket kalpasan a naduktalan ti City Social Welfare and Development Office (CSWDO) nga adda dagiti farmacia ditoy ciudad ti Laoag a saan a mangipapaay ti 20 a porsiento a diskwento kadagiti senior citizens.
Gapu iti daytoy, plano ti Sangguniang Panlungsod a paayaban ti farmacia tapno malawlawagan ti nasao nga alegasyon.
Mainaig iti daytoy, inbatad ni SP Member Jayson Perrera a karbengan dagiti senior citizen a gundawayan ti 20% discount kas maibasar iti RA 9994.
Kuna ni Perrera a mabalin a mapaserraan ti nasao a farmacia no mapaneknekan a saan a mangmangted ti diskuwento kadagiti senior citizens.
